Pu Maleeya Blogg

#4 Pacers vs #1 OKC

Kumin NBA Finals zet chu , tukin ah khan Game 3 an khel a, Pacers 116 - OKC 107, final score niin Pacers hian Series 2-1 hi hma an hruai a, Vawi 4 chak hmasa sa champion tur an ni.

Kumin Finals hi game ka la en miah loh bakah highlights pawh ka la en miah lo a, a hmuhnawm leh nawm loh pawh ka hre lem lo, Kumin chu Champion ngai lem lo an champion dawn a, a pui dawn khawp mai.

June 12 zing khan NBA Finals Game 3-na khelh a ni a, Pacers mual neitu chuan an mikhual Oklahoma City Thunder chu 116-107 in an hneh best of seven series khelh turah 2-1 in hma an hruai mek a ni.

Gainbridge Fieldhouse-a inkhelah Pacers tan Tyrese Haliburton chu an chakna hnar a ni leh bawk, hepa hi rin phak bakin a che tha a, kumin season chu a che tha ber zinga chhiar tel tlak a nih rualin, tun hma zawngin mite ngaihven leh en a ni ngai hauh lo. A ni hian point 22 a hmuh bakah assist vawi 11 neiin rebound vawi kua a la bawk, Point 27 neitu Bennedict Mathurin chuan hmun pawimawh a luah bawk a, quarter hnihna leh a hnuhnung ber an cheth that falna chu an chhawr tangkai hle, Game 4 an khelhna tur pawh anmahni mual bawk a nih avangin beisei an nei sang leh ta viau mai le.

Haliburton chuan, "Indy Player-te kan khel tha. Ben kha a khel tha zual hle a, bench player leh starter-te kan che tha tlang athil lawmawm tak a ni," a ti.

OK Thunder tan Shai Gilgeous-Alexander (SGA) chuan point 24 a nei a, mahse NBA Most Valuable Player leh Jalen Williams (26 points) te bakah Chet Holmgren (20) bak che tha an nei lo a, chak nan a tawk zo lo a ni.

Thunder coach Man Daigneault chuan, "Kan khel chhe lo , 4th quarter kan khel chhe viau mai a, inthlahdah theih a ni lo tih hre mah ila hrilh nawn kan ngai leh thin", tiin a sawi.

NBA champion ni tur chuan vawi li tal chak a ngai.

June 14, Inrinni zing dar 6:00-ah Game 4 Indiana ah bawk an khel leh ang.

NBA Finals 2025 [ 3-3 June 20, 2025]

Game 1 OKC 110 - 111 Pacers

Game 2 OKC 123 - 107 Pacers

Game 3 Pacers 116 - 107 OKC

Game 4 Pacers 104 - OKC 111

Game 5 OKC 120 - Pacers 109

Game 6 Pacers 108 - OKC 91

Game 7 OKC 103 - 91 Pacers

Update : OKC wins 4-3

Read More [...]

Posted in 2025, Finals, NBA, OKC, Pacers

CMC VELLORE

1. Vellore chu khawiah nge?

Christian Medical College (CMC) hi Vellore khua a awm a ni. Vellore hi Tamil Nadu State a awm a ni. Vellore khua hi India ram khawpui dang laka teh chuan khaw te tak te niin CMC Hospital vanga hmingthang ve mai a ni.

2. Vellore a chengte:

Vellore hi khaw vawh lai a awm ngai lo. Tamil Nadu State a awm anih avangin Tamil tawng hmang ho awmna a ni a. Saptawng leh Hindi pawh an thiam nual bawk.

3. CMC Chanchin hmasa lam:

America Missionary, Ida Sophia Scudder-i chuan India rama a pa rawngbawlna tawiawm in a awm a. India hnam chi inthliarna avanga Doctor mipa in hmeichhe damlo a enkawl theih ve loh nghawng chuan America ramah kir leh in Doctor a zir ta a, Vellore, Tamil Nadu, India ah India mite tana Medical rawngbawlna chu January 1900 khan khum pakhat hmangin a tan ta a ni. Chumi rawngbawlna kal zelah chuan Christian

Medical College and Hospital, Vellore hi a thang zel a. Hospital hmunpui bakah Eye Hospital te, Mental Hospital te leh Vellore khaw pawnah Branch Hospital/clinic a darh zau zel a. Doctor, Nurse leh Allied Health zir theihna pawh dinin hma a sawn zel ta a ni. CMC hi mimal leh Sawrkar ta nilovin, Kristian pawl inzawmkhawmin a neitu chan a chang a, Chutah chuan India leh Khawvel hmun hrang hrang atangin Kohhran leh NGO inzawmkhawmin a enkawl chhunzawm ta a ni.

4. CMC Tun dinhmun tlangpui:

CMC hian Hospital Campus hi hmun 10 velah a nei mek a. Chuta a pawimawh zual chu Main Hospital (Mizoten kan pan ber leh kan inenkawlna ber hi), Schell Eye Hospital, Mental Health Centre, CMC Chitoor Hospital te an ni a. Tunah hian Vellore khaw pawn (Chennai Road) ah CMC hian Hospital lian tham tak a sa mek bawk. Doctor hi 1700 vel an awm a. Hospital Patient khum 2858 a nei mek bawk. Nitinin OPD ah damlo inentir hi mi 9000 vel an ni a. Doctor appointment neilo, inentir tuma nghak ve tawp hi thahnem tak an zi mur mur reng bawk.

5. Damlo appointment chungchang:

CMC hi Doctor tha fal bik sawi tur awm chuang lo, Doctor pawh a huhova an thawh na hmun a ni a. Department pawh chi hrang hrang awmna a ni bawk. Doctor appointment hi a awlai lo hle a, in sawi nat viau avanga appointment hmuh ngawt theih a ni lo. Appointment duh chuan thla thum (3) advance in an buaipui a ngai tawh a. Chu chu online/internet (https://clin.cmcvellore.ac.in/webapt/Repeat/Login.aspx ) atangin emaw, a hmuna CMC Appointment counter a in line hmangin a tih theih a ni. Chawpchilh taka Appointment hmuh a har avangin a hmunah pawh appointment duh, counter a in line hi nitin mi sing dawn dawn an phe suau suau reng thin. (Emergency/Casualty, Online Appointment, A hmun a appointment)

a. Emergency/Casualty:

Hmanhmawh bawk si tan chuan CMC hian a hranin Puitling (Kum 15 chin chunglam tan) leh Naupang (Kum 14 chin hnuai lam) emergency a nei a. Naupang emergency hi CMC Hospital compound chhung ISSCC building ah a awm. Chest Pain unit hi emergency ni bawkin a pan nghal mai theih bawk.

b. CMC Hospital Registration tih dawnin heng hi fill up vek a ngai:

Hming, Pa Hming, Kawppui hming (Kawppui nei tan), Pianni, Thla leh kum, Phone number, Address, Hnathawh, Sakhua, email id, CMC ah eng department nge pan kan duh?, engtik ni, thla leh kum ah nge inentir kan duh tih hi dah khah a ngai. Hemi dah khat vek hian Registration tiin Doctor appointment siam tur a ni a, Chutah chiah chuan Hospital number kan nei ve thei ta tihna a ni. Doctor OPD appointment lehkha nei chuan khami lehkha ah khan kan inentirna tur building/floor/room/dar zat/Doctor hming a inziak vek thin. Online/internet a Doctor appointment siam tan pawh Doctor Appointment kan siam kha PDF in print chhuah tur a awm thin. Doctor OPD appointment hi harsatna bik tak avanga buaipui thiam nganglo tan Mizoram Presbyterian Kohhran-in a ram mi (Pu Inba - 09442712090), Hindi leh English a biak theih a ruai a. Harsatna bik tak nei tan a chunga registration tih dawn a dah khah tur ho khi thawn tur a ni. Hemi bakah hian refer tan refer-na thlalak emaw, refer loh tan pawh kan Doctor in kan natna a ziah lanna thlalak chiang tak thawn tel tur a ni. Mahni inbuaipui tan leh midang kuta appointment duh chuan chawpchilh taka tih in appointment hmuh mai mai theih a ni lo. Doctor OPD appointment duh chuan thla 3 advance in appointment nei tura hmalak lawk tawh tur a ni. Hmanhmawh thilah chuan Emergency pan bak tih theih a tam tawh lo a ni. Insawi nat leh insawi pawimawh avanga OPD appointment hmuh mai theih a nilo, mi khawngaih dawn chuan hnam hrang hrang damlo hmanhmawh si khawngaih tur vek kalkhawm kan ni.

c. Hospital a Admit chungchang:

CMC a in admit hi thil awlai a nilo. OPD ah doctor hmu in, kan doctor hmuh ten kan test atangin in admit ngai an tih chuan Admit-na tur lehkha min ziahsak ang a. Khami lehkha hmang khan room kan book leh a ngai a. Doctor lehkha tellovin a in admit theih loh. Room book pawh ni ila, room awl a awm loh chuan room a chan mai theih loh leh zel. Hospital a room book dawn emaw, in admit dawn emaw hian pawisa pek lawk (advance) ngaih chang a awm bawk thin. OPD kaltlang lova OPD a Doctor hmu lova direct admission tihdan a awm a, naupang tan chuan tih theih a ni lo. Puilting kum 15 chin chunglam, Doctor in an natna ziah lanna lekha atanga in admit thei tur nia a hriat chu Admit-na lehkha an ziah sak thei. Damlo zawng zawng erawh an ni lo. Kal (kidney) lam kaihhnawih te, Medicine Doctor case ang chi te, leh Cancer suspect kan tih ho hi keimahni hriat chinah chuan Direct admitna chance an nei thei (an nei ngei ngei kan tihna a ni lo). Chutiang case avanga Direct admission duh kan awm pawhin lo inhmakhua tur a awm nual tho avangin chawpchilh takin Ward ah a in admit theih loh. A lo berah damlo chanchin, a chunga hriat tur neuh neuh kan tarlan tawh ho khi Vellore a inaiawh tur te kha kar hnih (2) advance tala I thawn loh chuan an tan a harsa hman ang. Hetiang kan sawi case bak, tha na, Lung lam, tih vel hi chu direct admit an vang viau mai thei.

d. Mizoram Sawrkar leh CMC Hospital:

Tun hma chuan CMC Hospital leh Mizoram Sawrkar hian inlaichinna neiin Sawrkar refer-te chu Credit in (mimal sum pek ngai lovin) CMC Hospital ah an inenkawl thin. Tun ah erawh chuan CMC Hospital ah Damlo hi Mizoram Sawrkarin a refer pawhin mahni sum hmang phawtin, a hnu ah Medical reimbursement tihfel vek hnu ah Mizoram Sawrkar-ah sum senso chu Bill leh theih chauh a ni. Tun hnaia Health care Scheme thar – Golden Card pawh hi CMC Vellore ah chuan a hman theih loh a ni.

e. Medical Reimbursment:

Eng Health Scheme pawh ni ila, Sawrkar kaltlanga refer te tan CMC Hospital ah Medical Reimbursement Bill kan buaipui dawn chuan hengte hi kan hriat a ngai. CMC Hospital a in admit-te chuan Discharge Summary photocopy (Xerox copy) thil telin, Mizoram Sawrkar atanga Essential Certificate form nen, CMC Billing Section (105) ah Rs. 515/- pe in Medical Reimbursement Processing fee pe in kar khat emaw, a aia a rei emaw thangin MR bill turin a buaipui theih a. OPD a Doctor hmute erawh chuan Mizoram Sawrkar atanga Essential Certificate nen, CMC a kan Doctor rawnte hnen atanga Medical Report la a Photocopy (Xerox copy) thil telin CMC Billing section ah tho Rs. 385/- sengin MR Bill turin an thehlut thin. MR Bill chhuak tur hian kar khat chuang nghah a ngai thin.

f. Ward kalphung:

CMC Hospital ah hian Direct Admission a Mizo damlo an luhna thin A ward hi a man a to ber a. Single Deluxe AC Rs.8000/-, Single AC Rs.6300/- leh Double room AC (Semi) Rs.4300/- an ni a. A ward hi Private Ward kan tih mai ang chi kha a ni a. Heng bakah hian Non AC room, General Ward a awm leh nual a. General Ward ah chuan Single room, Double room leh General pangngai ala awm leh a. CMC Hospital ah hian kan awmna room man a hniam leh Doctor visit, Investigation, Operation, leh damdawi a hniam dawn tihna a ni. Mahse heng Room (A ward) nilova in admit dawn chuan OPD ah Doctor hmuh ngei ngei a ngai thung a, direct Admit hmangin Room mantlawm hi a chan theih loh a ni.

g. CMC Hospital a in Admit tan:

CMC Hospital-a in admit te chuan pawisa deposit ngaih chang a awm thin. CMC hian kar khat Bill zat an hrilh thin. Mahse kar khat Bill chu alo tam hman lutuk chuan Bank kalphungah nikhata pawisa hman theih zat (cash/card) aia tam a tlin palhin buaina a awm thei. Mahni Ward Doctor/Nurse te hnenah Hospital Bill zat hi ni 2 dan velah zawtin, ni 2 dan velah Cash Counter ah Advance pek tum thin tur a ni (Cash in ewmaw ATM Card hmanga Swipe in emaw). Vawi khat in admit ah a cash in Rs.1,90,000/- aia tam a pek theih loh a. Chuvangin ATM Card in emaw, bank Cheque emaw in rin thin a ngai. Hetianga inhmakhua hian chhuah (Discharge) dawnah bill tam lutuk avanga harsatna kan pumpelh thei dawn a ni.

6. Vellore thlen theih dan:

Kal dan tlangpui – Thlawhna in Lengpui atangin, Chennai emaw Bangalore Airport thleng. Airport atangin Taxi in Vellore thleng. Bangalore to Vellore darkar 5 (approx), Chennai to Vellore darkar 3 (approx). Vellore a Mizo ten car kan hman than (Prakash – 09488908773, Inba – 09442712090, Jay – 09488014768, Ravi- 09486002361) pawh an rinawm tawk a, a to lo hlawm hle, Airport ah heng ho hi an chah mai theih. Train a kal duh tan Kadpati (Vellore) thleng a kal theih a, kal chhung a rei deuh nangin a man a tlawm.

7. Hospital pawna Thlenna tur:

a. Mizoram House, 43rd Street, Sathuvachari Phase 2, Near CMC Annexe, Near Siva Lodge, RTO Road, Vellore 632009. Phone: 0416-2256823. Mizoram Sawrkar building niin Mizoram Presbyterian Kohhran Pastor te chhungkua in an enkawl a, House chu Mizote tan a ni. Ralkhat atangin a hauh (book) theih loh a. Room hi a ruak khat hle. Room duh chuan Vellore an thlen veleh a hmunah an book thin. Duhsak bik awm lovin Kohhran leh Sawrkar hotu pawh nise tumah duhsak bik a rem lo. Hmun dang Mizoram House ang a ni lo. Mizoram House a thlengte tan Mizoram House Choka ah mahniin ei rawng a bawl theih bawk. Mizoram House ah hian a zawnin thla 2 aia rei thlen phal a nilo, thlen chhunzawm duh chuan thla 2 tlinah room chhuahsanin room an book thar leh phawt anga, an chan hunah an duh chuan Room an luah phalsak leh chauh a ni. A chhan chu Vellore ah hian kumtluanin Mizo damlo kan thahnem vang a ni.

b. Siva Lodge – Vellore Mizoram House bul chiah a Private Lodge a ni a. AC leh Non AC room niin phone in room book mai theih a ni. Phone: 7397013174. Hindi leh English in an biak theih. Mahni room ah eirawng a bawl theih.

c. CMC Annexe (Near Mizoram House): Mizoram House bul lawk, CMC patient leh Staff te tan a ni. Non AC niin Rs.490/- man niin khum single 2 a awm. Eirawng bawl nan Electric Induction an dah a, mahni inbawl chawp tur a ni. Advance Booking a theih loh. Phone – 0416 – 2255736/2253946. CMC Hospital thuneihna hnuaia Lodge a nih avangin English a biak theih an ni thin. CMC Annexe hi CMC Hospital Compound ah pawh a awm a, CMC staff leh patient tan tho niin hei hi chu thla khat hmalama room book lawk a ngai thung.

d. RJ Residency: Hei pawh Mizoram House bul lawk a private lodge niin ralkhat atanga book theih a ni. AC (rs.1200/- approx.) leh non ac (Rs. 500/- approx) room a awm. Phone – 0416-2255304 e. CMC Hospital bul hnaiah hian Mizote thlenna thin hotel tam tak a awm bawk. Meher, Avanna In, Vaibhav residency tih te. Hotel SMS pawh a awm bawk. Hotel thenkhat hi Online/internet atanga book hian a tlawm duh hle bawk.

8. Vellore Mizo Inkhawm:

Thawhlehni, Ningani leh Inrinni zan dar 7:00pm hian Mizoram House Dormitory ah Tawngtai Inkhawm neih thin a ni a. Pathianni dar 3:00pm atanga dar 4:00pm hian CMC Hospital Chapel ah Mizo Inkhawm neih thin a ni bawk.

9. Chaplain:

CMC Hospital ah hian Chaplaincy Department a awm a. Chaplain 24 (hnam hrang hrang) an awm mek. Hetah hian Mizoram Presbyterian Kohhran chuan Pastor a thawh a. Chu Mizo Pastor chuan Mizoram House leh Mizo damlo a enkawl bakah CMC a Chaplain dangte hnathawh ang bawkin Hospital ah nitin darkar 8 hna a thawk a. Mizo damlo chauh nilovin a Ward chan a damlo eng hnam pawh tlawh kualin a enkawl thin a

ni. CMC Chaplaincy Department rawngbawlna kaltlang hian CMC Staff, student leh patient te ah hian kumtluanin Bible Study, Counselling, Retreat, Kohhran Sponsored Students Meet, Pathian Biak Inkhawm hi a awm kumtluan zak a ni. Pathianni hian nilengin Hospital Chapel ah tawng hrang hrang inkhawm a awm nilen bakah tlaiah English in a duh apiang chhim theih turin Chaplaincy Department hian inkhawm a buatsaih thin a ni. Chapel a Inkhawm theilo tan pawh Chapel a thusawi hi mahni Ward atangin alo ngaithlak theih bawk. CMC Programme a awm reng rengin, Chaplain pakhat tal an tel ngei ngei thin. CMC inrelbawlna Committee lian berah pawh Chaplaincy Department head apiang chu CMC Committee member pawimawh an ni nghal zel bawk, Chu mi Committee chu CMC Council Meet tih a ni.

10. Tlipna: Vellore a mizo kal turte hriattur hi a tam khawp mai a, hriat sen a ni lemlo. Thil tam tak chu tawn chawpa hriat chi a ni bawk. Zuk leh hmuam ualau taka tih a rem lova. An ni ngaih chuan Zuk leh hmuam tih hi Kristiante tih atan a mawi lova, hriselna atan pawh Kristiante chuan kan ti turah an ngai lo. Vellore kal tur I nih chuan heng kan thuziah aia chipchiar zawk leh thil dang tam tak hi www.facebook.com ah open group in Vellore kal turte tan tih group siam a ni a. I bangbo loh nan leh I chetchhiat loh nan hemi group hi lo join la, lo chhiar la, I mamawh thil tam zawk I hmu anga, I inhmakhua thei dawn nia. Damloh chuan Doctor hmuh vat vat a, In admit vat vat a, haw vat vat duh vek kan ni a. Mahse kan duh hi a thleng vek kher lo tih hriat a ngai a. CMC Vellore a inentir tur leh Pathian malsawmna dawng tur chuan mi dawhthei nih a ngai tel. He CMC hi miten Lalpa rinna avanga an din a ni a. Lalpa rinna nen I lo pan dawn nia.

Rev. Lalbiaksanga Pachuau

CMC Vellore – 13.2.2019