Tuesday, May 9, 2023

MI CHAK - Upa Bonny Lalrindika (Agape Vol. XXVII No. 251 May 2013 Page 15)

 Pu Bonny-an a natna a hriat tirh a, a rilru hetiang in a sawi : "Agape chanchinbu (2013) a “MI CHAK “ tih ka ziak kha ka hre chhuak nghal a. Pathian khawngaihin a zarah he natna hi hneh ka tum, tih tur hmachhawp hrang hrang ka neihte tih theih ngei ka tum. Damna khawp huaisenna emaw thih ngam khop huaisenna emaw nei turin ka inpeih. Lalpa kutah ka innghat".

Tawngtaisakna leh ngaihvenna nasa tak a dawn vanga a lawmthu sawiin, Tawngtainaah hre reng turin min ngen e. - (Synod Hospital Pi Puii In No. 126)

MI CHAK

Upa Bonny Lalrindika (Agape Vol. XXVII No. 251 May 2013 Page 15)

Mizote thinlunga thil bet tlat pakhat chu mi chak ngaihsanna hi a ni a. Hei hian kum za tel liam ta ah khan Mizote thinlung hi tun khawvel danglam tak mai atan hian mihring mamawh lian tak mai pakhat chu a lo kui tiak daih tawh mai a lo ni.

Chak kan ngaisang a, miin chakna a pai tam dan hriat chaknain kan khat a, mikhual thleng thlengin Zawlbuklah buan luih luih mai thin hnam kha kan ni a. Nunphungah mizawn inchuh a la nun lai phei kha chuan mi chak nei tlem khua chu an mualpho hle thin a nih kha.

Vawiin ni thleng hian mi chak hmuh chaka tuihalna chuan Mizote thinlung a la luah reng a, sipai Lammualah belpui inchuhna kan la huaihawt luai luai a, naupang kokichhuan pawl nen a en turin kan la luang khawm ruih ruih reng a nih hi.

Nia, mi chak nih hi mitin mamawh a ni a, kan chakna erawh chu a inang lo a ni. He article-ah hian banbul liante chakna hi ka sawi tum a ni lo. Awm bawr chhah thate thahrui ropuina sawi ka tum bawk hek lo. Mahse tunlai khawvel nunphung thang danglamin mi chak a mamawh chu banbul sawi tham nei lo te pawhin an nei thei tlat si.

Mi chu natnain buan chau sela, khum laizawl bak pel thei lovin mut hmuna chaw pek ngai pawh nisela, chakna ropui ber chu a nei thei tlat. Chu chakna chu chhungril nun lungphum, nun innghahna nghet, eng thil mahin a nihphung a thlaksak theih loh chu a ni.

khawvel hi chuatiang chakna nei thei lo tan chuan thui kal theihna chi a ni ta lo tial tial a,vanglai hun hmang mekte pawh rei lo te ah mihring an tling zo lova, awm ve tlakin an in hre lo va, an inawkhlum leh nawlh nawlh mai thin. Mi chakte dam khawchhuahna khawvelah hian nun chhungril chakna chu i mamawh dawn a ni.

Eng vangin nge thlemnaah i tluk? Samsona chakna ropuizia chu Bible-in a sawi a, mi nazawng neih phak loh chaknain Pathianin a thuam a, mahse a thahrui ropuina chawimawitu ber tur chhungril nun chakna a nei tel lo. Kha ngei mai kha thahrui ropui timualphotu a lo ni ta a ni.

Technology lamah khawvelin um phak hleih theih loh khawpa chakna in hma a sawn a, chu chuan mihring nun nasa takin a thuai vel a, thil a inthlak zung zung a, tha tih zawng te, hlu tih zawng te chu minute tinin a inthlak a ni mai.

Heng thil hi thlipui angin a sawi thei ang. A nuaitu hma a mihring tlukna leh tluk lohna hi a nuaitu thil nat leh chak danah a innghat ngai lo va, a dinna hmun nghet leh ngeh lovah a innghat zawk thin. Chu inngahna chu tuna CHAKNA kan sawi hi a ni a, nuna bet tlat a ni.

Zu vanga kan khawtlang nun hrehawm thinzia tan chhana hmangin zu khap tul tihna a lo piang a, zu hi awm lo se nun a ralmuang dawnin kan hria a, tin, zu chu Kristian nun nen a inmil lo hrim hrim bawk a. Mahse khapna dan khauh pui pui hmang pawhin kan beisei chu kan thleng thei lo. A chhan chu zu khapna dan lek kawhtu chak ber tur NUN lamin a lek ve miau lo a ni. Zu laka fihlim tur hian MI CHAK nih a ngai a, zu um thuhruk zawn hmuh zawh loh vanga in lo va nileng ta hram ni lovin, zu um inhawng sa bula thu reng chunga ngaihnep theihna chakna a ni i mamawh ni.

Chakna chu thahrui atanga lo chhuak tur a ni lo va,chhungril lama ding tur a ni. Chu chuan nun hi a khalh tur a ni a, he chakna tel lo hi chuan dan tha leh mihring thahrui tam tak fuan khawm hian eng mah tih theih an nei lo.

Awh tur leh it tur thil tam tak kan velah hian inlar sup sup mahsela, miin a dinhmun atanga a en a, a tana tul lote chu a ngainep tur leh khawih lo tur a chakna a neih phawt chuan chung thilte chuan a nun khawih chhe turin chakna an nei thei lo.

Sex hman sualna thanga i awh buai chhan te, tul lo taka leiba i neih teuh chhan te, thil ho te a i tihtauh bur bur thin chhan te, hnu thup tura mi hriat lohva i buai em em thin chhan te, i nun in lem a chan avanga i dinhmun dik tak thup tulna siam chawpa i tal buai chhan te, harsatna chhuanlama nangma nun ngei tichhe tura thil chin tha lo i lo khawih tak chhan te zawng zawng kha chutiang thilte hneh tura i palen tawk loh vang a ni lova, i nun a nep em vang an ni vek.

Tichuan, tunlai khawvel, eng emaw vanga nun hlawhchham leh beidawng tak neih thut theih rengna hunah hian harsatna chin fel hleih theih loh leh lak kian hleih theih loh hrui hnawkah i nun a tal buai dawn em tih chu, ei leh bar dapna kawngah a ni emaw khawsak phung nuam leh hrehawm thuah emaw, i kristianna nun vuan nghet tlat tur emaw i nghehna leh ngheh lohna tur zawng zawngah he nun lungphum, MI CHAK ni tura chelh ding tur che i neih leh neih lohvah engkim a innghat dawn a ni.

Chu chu i neih loh chuan khawvel hian nangmahah tanpui theih dan kawng che a nei dawn miah lo tih hria la. I vela thil che leh inlumlet hi laksawn theih a ni dawn lova. chutah chuan i phak tawk zelah nun chiai lo nghet taka dingin, i thlir lam hawiin hma i sawn ve thei dawn em tih inen la, MI CHAK ni turin i thinlung buatsaih ang che. Chutiang chona i hmachhawn hunah chuan nangmah ngawtin chakna chu i nei dawn lova, Isua Krista ke bula awm tlat chungin, a zirtirna leh kaihhruaina ngaichang la, chutianga i nun dawn chuan a thin deuh hun a awm thin ang tih hria la, mahse i thing hlen dawn lo. Tichuan ANI chuan MI CHAK ni turin a tanpui ang che.