Rev. Billy Graham (1918-2018)
-
Frante-a
Billy
Graham (William Franklin Graham Jr.) hi November ni 7, 1918 khan William
Franklin Graham Sr. leh Morrow Coffey te fa pali zinga a upa ber ni turin USA a
North Carolina State-a khaw pakhat Charlotte khuaa bawng vulhna farm ah a lo piang
a. A nu leh pate hi Pathian biak ngai pawimawh mi an ni a, Billy-a pawh hi Associate
Reformed Presbyterian Kohhran inenkawlna hnuaia seilian a ni. Naupangte anih
lai atangin lehkhabu a ngainain a chhiar nasa em em a, Tarzan-a lehkhabu a
chhiar phei chuan a hneh ngang a niang thingkungah te lawn kualin Tarzan-a
tihdanin a uaiin a hram vel nasa viau thin reng a ni. An chhungkaw eizawnna
avangin Billy-a hian a naupan laiin bawng vulh dan te, a hnute buatsaih dante
leh ran chaw siam dante a thiam em em vek a ni.
“A
khawvel mi lutuk” tia Charlotte khua thalai pawl pakhatin an member ni tura an
hnawl Billy Graham hi Evangelist Mordekai Ham-a rawngbawlnaah kum 16 mi a nih
laiin Pathian hnenah a inhlan a. Tichuan, Florida Bible Institute-ah Pathian
thu a zir ta a, chuta a zir lai chuan kawtthlerah a vawi khatna atan Pathian
thu a sawi ta a. Pathian thu hril chu a kalna tur kawngah ngaiin kum 21 mi niin
Baptist Kohhran Pastor ni tura nemngheh a ni ta a ni.
Kum
1954 khan Ruth Bell-i nen inneiin fa panga, Franklin Graham, Anne Graham, Gigi
Graham, Ned Graham leh Ruth Graham te an nei a. Ruth-i hian kum 87 mi niin July
14, 2007 khan a lo thihsan tawh a ni.
Dwight
Lyman Moody (1837 – 1899) hnua Chanchin Tha hriltu ropui ber a chhal Billy
Graham-a rawngbawlna lo alh chhuah tanna chu kum 1949-a Los Angeles-a “Tent
Campaign” an neih atangin a ni a. A rawngbawl tan tirh phat atanga a thuvawn
chu, “Thiltum pakhat ka nei, chu chu thlarau bote chhandam a ni” tih hi a ni. A
chanchin, chawimawina a dawn leh a rawngbawlna zawng zawng sawi sen a nilova, a
langsar zual han tarlang ila.
Ø Mi
maktaduai 210 chuangin a thusawi an ngaithla tawh a, mi maktaduai 2 chuangin
Krista pawm tura a sawmna, “Come Forward” chu an chhang hial a ni.
Ø Kum
1996 April thlaa Easter Sunday-a a thusawi chu ram 160 a mi maktaduai 2 aia
tamin tawng chi 8 a lehlinin an ngaithla.
Ø Kum
1967 khan Protestant zinga a hmasa ber ni turin Beltmont Abbey College, Roman
Catholic enkawl atangin Honorary Degree a dawng.
Ø Kum
1983 khan America civil mite chawimawina dawn theih sang ber “Presidential
Medal of Freedom” a dawng.
Ø Kum
2001 khan Queen Elizabeth II hnen atangin “Honorary Knight Commander of the
Order of the British Empire (KBE)” a dawng.
Ø Ram
hrang hrang Radio Station 1,000 chuangah speaker a ni.
Ø American
la dam lai zinga ropui ber (Greatest Living American)-ah tum enge maw zat thlan
a ni.
Ø Honorary
Degree 20 lai a dawng a, hnawl pawh enge maw zat a nei bawk.
Ø Billy
Graham-a ruang hi amah zahna entirnan US Capitol Rotunda-ah ni 2 chhung dah a
ni a, civil mi zingah he dinhmun luah thei 4 na a ni.
“Kristian
nun hi nun chak mar reng a ni lem lova, kei ngei pawh hian rilru hnualna thuk
tak ka tawn avanga Pathian hnena, “Aw
Lalpa, min ngaidam la, min tanpui lul rawh” tia mittui nena ka tawngtai lawm
lawm a tul ve thin”.
– Rev. Billy Graham
Rev. Billy Graham (1918-2018) | KHARCHHAWN |