Spain goalkeeper leh captain Iker Casillas chuan FIFA World Cup chu a chawi ta a, amah ang bawkin Spain rama mipuite leh khawvel hmun hrang hranga he team tantute lawmin an au.Soccer City khelmuala entu mipui 84,490 leh, khawvel puma mi maktaduai 700 chuangin TV-a an en inkhelah hian referee Howard Webb chuan yellow card vawi 14 a phawrh a, Netherlands player John Heitinga phei chu a tawp dawnah hnawhchhuah a ni.
Inkhel chanchin
Netherlands-in ball pass thiam hmingthang Spain hmachhawn dan tur duan lawk an nei tih a chiang a, a tir atangin foul a tam hle - a tawpah phei chuan vawi 28 ngawt an foul hial a ni.Spain-in an duh angin ball an chang thei mai lo a, Netherlands pawh an hlauhawm thei chuang lo a, midfield-ah an 'indah-nil' tawn a ni ber mai.Spain hian minute 5-naah chance an hmu nghal a, Sergio Ramos chuan Xavi freekick pet chu hnai set sawtah a tauh a, goalkeeper Maarten Stekelenburg chuan a lo dang. He mi hnu hian 'goal chance' a tam lo a, yellow card a tam thung - minute 28-ah mi pangain card an hmu tawh.First half-ah chhinchhiahtlak a thleng lem lo - Nigel de Jong-a'n minute 28-naah Xabi Alonso-a a 'karate' kha a langsar deuh ber a ni a, red card a hmu lo a vannei hle.Second half-ah Barca-a khel dun thin Xavi Hernandez leh Mark van Bommel-te an inhau pâng pâng tawh a, a boruak a tang tawh hle. Chutah le, Arjen Robben kan hmu ta - minute 62-naah Wesley Sneijder-a ball duhthusam pek phei a chang a, nimahsela a hmaa awm chhun Casillas-a ke zawnah a pet a, a goal lo.He mi hnu hian winger tlan chak Robben bawk hian chance a nei leh a, Carles Puyol chuan a pawt a, Robben hi tlu duh hek lo le, referee-in a hâm lo a - Puyol hi an hrem lo a, Robben leh Dutch fans an thinur hle.Cesc Fabregas chuan a luh hnu lawkah Robben-a chance tluka tha a hmu a, a pet goal bik lo.
A goal ta e
Minute 109-naa Iniesta titlutu Heitinga an hnawhchhuah hnu lawkah, Player 10-a khel Holland-in freekick an hmu a, Sneijder-a'n a pet a, Spanish player a per a, corner tur a ni. Referee-in a hmu sual palh a, Spain-in goal kick an hmu a, he ball kal phei hi a goal ta!Villa thlaktu Fernando Torres-a ball pek chuan Iniesta hnen a thleng lo a, he ball lo kir hi Torres ang bawka lut thar Fabregas chuan Iniesta hi a pe phei leh a, keeper Stekelenburg-a tana dan rual loha kawhin a pet goal ta.Hun a tawp a, Spain chu World Cup-a a vawi khatna atan an champion a, Euro 2008-a an champion hnuah an ropuina a kim ta.
Inkhel thlirna
Football expert-te chuan final 'hmuhnawm loh' tiin an sawisel deuh vek a, a bikin Netherlands khelh dan an dem. Ball aiin mihring an tum emaw tih mai tur a ni a, World Cup final-a yellor card vawi ruk bak an la phawrh ngai lohlaiin vawi 14 phawrh a tul ta a ni.Spanish thiampuipate pahnih - Iniesta leh Xavi-te chu Holland defensive midfielder De Jong leh Bommel-te chuan an bitum chawt a, an ball an chhuhsak nual a, an pet thlu nual bawk! Spain-in an thiam angin an khel thei lo a, Holland-in an thiam tih hriat theih mang lohin an khel bawk - chak tum ve ve mah se, 'chak loh hlauhthawnnain' team pahnih a tibuai.Spain-in 'fit lo' Torres aiah Pedro bawk an luhtir leh a, tun tum chu Pedro a nil. David Villa meuh pawh lang mang loin an veng thei a, hetiang huna striker pahnih - Villa leh Torres - inkawptir chu Spain coach Vicente del Bosque tan thil 'ngamawm' a ni tawh lo a, midfield-a player panga dah loh chuan a hlauthawnawm tlat - chuvangin Torres hi a luhtir lawk lo reng a ni.Chance awm chhunte kha lut ta se, 2-2 vela inhnehtawk thei an ni a; amaherawhchu a tawpah Iniesta goal-in team pahnih a then hrang ta a ni.
Spain leh a chhehvel
Madrid khawpuia mipui nuai chuangin screen liana an en dan te, Spain atanga indan tuma zalenna sual reng Catalan mipuiin an khawpui Barcelona-a a vawi khatna atana 'Spain' inkhel screen liana an enna hmuna mipui 75,000 zet an punkhawm thute a kimchanga ziah vek sen a ni lo. He Spain team hian goal riat lek thunin an champion-pui a, World Cup pet chhuak team zinga goal thun tlem ber an ni. European zinga an khawmualpui pawna champion hmasa ber an ni a, game hmasa bera Switzerland hneh lo chungin an champion bawk a - hetianga game khatnaa chak lo chunga champion thei hi an la awm ngai lo.Spain hi World champion ni thei pariatna an ni a; a pumpuiah European team vawi 19 an champion tawh a, South American team vawi kua.
Coach-te thlirna
Vicente Del Bosque chuan, "Kan ram pumpuiin kan lawm a, hei hi infiamna huang chhungah a tawp mai lo ang... kan zavaiin kan hlim em em a ni," a ti.Spain football khelh dan chu, "2008-a kan thil tih kha kan chhunzawm zel a, kan chhunzawm zel ang... 'beautiful football' kan khel a, chumi rah chu kan seng a ni," a ti.Spain boss-in inkhel a thlir a, Kan khingpuite kha an khel tha ka ti a, ball pawh kan chang hman mang lo a, khelh an hautak em em a, chance pawh an nei tha a ni. Holland kha an khel rang si a, khami lo do lêt kha a harsa a, nimahsela inkhel hun tam zawk kha kan thunun theiin ka hria," a ti. Holland khelh dan a sawisel duh lo a, "Ni e, an rough deuh chang awm mah se, football-ah a tel ve vek a ni," a ti.Dutch coach Bert van Marwijk chuan, "Player 10 kan ni chung khan penalty shoot out kan thlenpui theih ka beisei tlat a, nimahsela mihnite li vel a la awm a, kan chak ta si lo... sport-ah hi chuan hetiang hi a thleng ve thin a, a na duh khawp mai," a ti a, Spain chu team tha zawk an nih thu a sawi.
Source : http://vanglaini.org
No comments:
Post a Comment