happy new year

Nice 

Read More [...]

KUM THAR CHIBAI

 

Read More [...]

MIZO UPATE'N THIANG LOVA AN NGAIH ṬHENKHATTE

Hei le... 

1) Anchhe lawh mahni chungah a tla thei. 

2) Buhtuha ramriah loh tur. (Buh lukhama riah loh tur).

3) Do loh thah chu chhuanthum thlengin sihsar a chhuah thei. 

4) Farnute nupuia inneih thleng. 

5) Favah inneiha chhawm. 

6) Hmeichhe manah Dar hman loh tur.

7) Hmeichhe thah ruang a zangthala dah loh tur. 

8) Hnam leh Samkhuih inhman ṭawm. 

9) Huan mawngtawlh chu Nu thihna.

10) Huanpal leh lo ri an sawn ngai lo. 

11) In ngawidawha sak. 

12) In ding lai chhungkhunga in sak. 

13) Inpui luah dawna chhungkaw kim loh. 

14) Kalkawng sira Thinglian tlu chu lenglai thihna. 

15) Kawr karkalaka in sak a thiang lo.

16) Keptuam hmuh a thiang lo.

17) Khawtlang awmni serh loh chu Van ni chhalna. 

18) Khual aṭanga nau hming inthawn a thiang lo.

19) Kum khata in khat aṭanga unau hmeichhia pakhat aia tam pasal neih a thiang lo. 

20) Leido hmeichhe mutpui chu vanni hmuh lohna. 

21) Leido palai thah chu vanni hmuh lohna. 

22) Lo va Thingsaihrua, Thinghlang, Thinglubul awm. 

23) Lo va Zawng lu ro, Sih leh Leiruangtuam awm. 

24) Lo mawngtawlh chu Pa thihna. 

25) Lui kala zahmawh sawi chu hlawhchhamna. 

26) Maimawm keṭang thlawn leh Ketaminu ke chhiar.

27) Mi lu hawnin a beng hawn tel loh tur.

28) Midangte nupui kutthlak an duh lo. 

29) Mikhual thlen duh loh a ṭha lo. 

30) Naupai laiin luipui kan loh tur.

31) Sahgha chau man nan ngawidawh loh tur. 

32) Ni khat thilthua in pakhat aṭanga chhim leh hmar, chhak leh thlang hawi zawnga zin chhuah loh tur.

33) Nite nena mo nihdun. 

34) Nu leh pa dotu an dingchhuak ngai lo.

35) Nu leh pa ro dehral chu tlakranna.

36) Nupuite rai laia Ranpui kawchhung hai. 

37) Nupui Uire ngaihdam a thiang lo.

38) Pafa inngaih. 

39) Pi leh pute kawmthlanga awm. 

40) Piangsual nuihzat. 

41) Ral beih ni a nunau chunga kutthlak.

42) Ramhnuaia kawng laia Artui chhar. 

43) Ramhnuaiah hmeichhia leh naupang hnung dal tir. 

44) Rannung leh nungcha hleihluaka sawisak.

45) Ruai kila aia upa bar khalh.

46) Sa beih dawna hmanraw tahhriam chawp.

47) Sakei aih ni chuan La deh loh tur. 

48) Sakei zim niin chawfun loh tur, thingkungah pawh lawn loh tur.

49) Sakeiin sa awk a lakin chuh loh tur. 

50) Sal man midang hlanchhawn.

51) Sal mante chunga nunphung pangngai baka thil tih.

52) Sanghal hriak thih.

53) Sapui kawngkan bih zui.

54) Sih a bawlhhlawh paih.

55) Thingzung leh leihlawn thinga fawm. 

56) Thlama sangha rep. 

57) Thingkungah zung suh. 

58) Thlama ui talh.

59) Vapual no chawm lai thah.

IN SAK NANA THIANG LO 😘

(a) Fapa indang leh Makpate, Nu leh pa leh Puzawnte kawmthlanga in sak.    

(b) Kawn leh Kawr hnara in sak.

(c) Kawngpui kana in sak.

(d) Mualdung zuizawnga in sak.

Read More [...]

SEPTEMBER 11 | HAPPY BIRTHDAY

 

Rinhluan Birthday card min lo siamsak a lawmawm hle mai.

Read More [...]

SEPTEMBER 1 | BER THLA LE

 

Read More [...]

Rawngbawlna Hlen

 

Rawngbawlna Hlen

II Timothea 4 : 5

Rawngbawlna Hlen tih hi Thupui lar tak leh sawi hlawh tak pawh a ni awm e, a bikin KTP huang chhungah phei chuan kan ngaihthlak tam pawl tak pawh a ni awm e. Thupui pawimawh tak pawh a ni. A hma berah chuan – Rawngbawlna kan tih hian keimahniah engtinnge kan lo ngaihtuah a, engtinnge kan hriatthiam dan ni ang le? Rawngbawlna chu engnge a awmzia ni ta ang le? Rawngbawlna chu kan hmaa tihtur awm apiang rinawm taka Pathian hminga kan tih hi rawngbawlna chu a ni tiin a tawi zawngin sawi theih awm e.

Kan nitin hnathawhna peng hrang hrang te hi kan rawngbawlna hmun chu a ni. Kan hna te hi Pathian min pek a ni a, chu hna thawk thei tur chuan chakna te, hriselna te min pe a, chu hna chu taima taka Pathian ropuina tura kan thawh kha rawngbawlna pakhat chu a ni. Keimahniah Pathian hmel lo lang sela, ti tein kan tawngtai thin. Mahse heti zawng hian sawi ta ila, kan hmelah khan Pathian hmel kha automatic-in a rawn lang dawn reng reng lo va, keimahni hmel tho kha a ni reng dawn a ni, a awmzia zawkah erawh chuan kan hna rinawm taka kan thawha mite fak tlaka kan thawh khan Pathian a ropui a chu chu keimahnia Pathian hmel a lanna zawk chu a ni.  

Kawng dang lehah chuan Kohhran rawngbawl hi Pathian rawngbawlna a ni, nga ti maw? Kohhran lu chu Krista a ni a, Kohhran chu Krista taksa a ni tlat a ni. Lu leh taksa chu a inzawm tlat ang hian Krista leh Kohhran chu a inzawm tlat a ni. Kohhran rawngbawl lovin Pathian chauh rawngbawl chu a harsa mai thei a ni. Kohhran sawisel leh khei khei siin Pathian rawng ka bawl ti ila, rawngbawlna dik a ni angem? Kohhran Aw hi Pathian Aw a ni, tih hi I hre thar ang u.  

Rawngbawlna hlen hi engnge awmzia ni ang? Timothea I & II hi mimal hming pu an ni nain an thu ken avangin Kohhran enkawlna lehkhate tiin an vuah a. Timothea II : Bung 4 : 5 ah khan Tirhkoh Paula’n Timothea a fuihna kan hmu a, engtiangin nge a fuih kan tih chuan a rawngbawlna hlen turin a fuih a ni. Khang hun lai khan zirtirna diklo te a tamin tlukna tur khawp thil kha atam ve hle ni tur a ni . Chutiang karah chuan rawngbawlna hlen turin a fuih a ni.

            Kum alo thara Kohhran, KTP leh Group-ah te mawhphurhna hrang hrang min pe a, tichuan kum tawp alo nih khan rawngbawlna hlen ta veng vengah kan inngai em? Kum khat chhung atan chuan kan hlen ngei a lawm. Mahse chu chu Pathian Thua rawngbawlna hlen a tih nen chuan a in ang lo deuh a ni. Paula hian Timothea hnenah hian kumkhat atan I rawngbawlna kha hlen rawh a ti reng reng lova, a awmzia takah chuan i thihni thlengin Lal Isua chanchin tha thu hi hril zel ang che a tihna a ni. Chu chu rawngbawlna hlen awmzia zawk chu a ni. Kum khat atana rawngbawlna hlen kan tih ve hi chu a nihna takah chuan kumkhat chhung atan kan rawngbawlna kha kan tlak fel tihna chauh zawk a ni, hlen tihna lam a kawk lo.

Rawngbawlna hlen tur chuan engtinnge kan tih ang?

Tirhkoh Paula hian Timothea a fuihnaah hian a rawngbawlna hlen turin thil pathum a tihtur a hrilh hmasa a ni. Chu chu Engkima fimkhur te, Hrehawm tuar te leh CHanchin Tha Hriltu lam hna thawh te a ni.

1. Engkima Fimkhur :

Helaia Tirhkoh Paula’n Timothea a fuihna  awmzia hi chu Engpawh atchilh mai lovin, rilru fim takin ngaihtuah zel rawh, a tihna a ni. Thil kan tih dawn reng rengin rilru fim tak hmangin kan ngaituah hmasa tur a ni, hei hi ti ila, Lal Isua chawimawiin a awm a ngem? Tih hi kan ngaihtuah hmasak a tul hle mai. Chuvang chuan Pathian khawngaihna avanga he khawngaih rawngbawl hna hum hi hlen turin fimkhur a ngai hle mai. Tunlai khawvelah thiamna te a sang tawhin khawvel hi kan kutah kan hum tawh a, kan tuai liam zung zung hi a ni ber tawh a. Kan nun la peng thei tu thil tam tak kan tawng chho mek a. Mit leh beng tlai na tur thil hi a tam tawh lutuk a. Pathian thu aiin thil dang kan tuipui tawh zawk a, fimkhurna tur a tam hle mai.

 

2. Hrehawm tuar :

Hrehawm tuar han tih hian eng ang hrehawmna nge ni ang, hrehawm tawrh han tih pawh hian hriat thiam a har khawpin ka ring. KTP lam hawi zawngin han sawi ta ila, Group Secretary ten whatsapp group-ah zaninah chumi khami te balu chu thiar tur a ni a, hnatlang hi chawpchilh deuh a koh anih avangin member ten i ngai pawimawh hram hram ang u, tih thu an rawn post a, kal loh kan hreh si a, rilru buai duh hle mai. Balu thiar emaw Rawra thiar emaw kha tuman an peih bik loa, tuman an ngeih bik reng reng lo. Mahse rawngbawlna hlen tur chuan chutiang chu kan tawrh ve angai a lawm. Tih fan fan te, tih hram hram te hi ringtu chaklo awm dan a ni lova, ringtu puitling awm dan zawk a ni. Inkhawm fan fan te, Kohhran, Branch leh Group Activities a kal hram hram te hi ringtu puitling zia a ni.

 

3. Chanchin Tha hriltu lam hna thawh :

            Chanchin Tha hril hna ti te pawhin a sawi theih awm e, Tirhkoh Paula khan Timothea kha Chanchin Tha aia thildang ngaih pawimawh zawk a neih a hlau a ni. A awmzia ah chuan chanchin tha chauh buaipui turin a duh a, buaipui tur dik tak buaipui turin a duh a ni. Chuvangin buaipui tur dik tak Lal Isua Krista Chanchin Tha hi i buaipui ang u. Tunlai khawvel changkang zelah chanchin tha nilo thildang min awi tlei tu hi a tam tawh lutuk a, chuvang chuan kan rawngbawlna hi kan hlen lo palh hlauh a nge.

             

 

Read More [...]

Posted in Article

LAWM CHUNGA RAWNGBAWL

 LAWM CHUNGA RAWNGBAWL

 Zanin a kan ngaihtuah ho tur a kan thlan chu, "Lawm chunga rawngbawl" tih a ni. Ka theih tawkin kan inbuatsaih a, Rawngbawl tura Chhandam thalai te hian Lawm chunga Pathian rawng kan bawl zel theih hi a pawimawh hlein ka hria, zanin a kan ngaihtuah tur pawh hi kawng khat tala hlawkna kan neih theih beiseiin ka rawn thlang a ni.

 

A hmasain Pathian thu i lo ngaithla ang u,

Sam 100 : 1-3, I Korinth 1:26-29 Isaia 40:29-31

Kan Bible chhiar te Lapan kan za atan malsawm rawh se, Amen..

 

Kristian thalai member kan nih chuan Rawngbawl tur kan ni, KTP thil tumte atang hian a chiang khawp mai.

1. Isua Krista rinna leh amah anna kawnga thalaite hruai

2. Kohhran kutke ni tur a thalai te buatsaih

3. Kohhran hnathawh tihpuitlin

4. Krista chanchintha puan darh.

Kan thiltum thelh daih te hian rawng kan lo bawl reng tawh em? Sawi zui vak ka tum lem lo a tikhan duhtawk ila.

 

Kum tin kum bulah rawngbawlna peng hrang hrangah kan in ruat thin, A hlanna hun urhsun tak in kan nei thin. Hruaitute kal tlangin Rawngbawl na ki peng hrang hrang ah kan thiamna leh theihna avanga ni lovin kan tih ve theih awm tawk ti turin min ruat a kan ngai hlu a, insit tak chung a pawmin, Lawm taka heng rawngbawlna kan hlen hian Pathian duhzawng ti kan ni. Heng kan chanvo chan te hi hna a ni lova rawngbawlna a ni.  Chutihrualin,Rawngbawlna hi kan tih hram hram chuan Lawm chunga Lalpa rawngbawl hi harsa thin. Mihring nun hi han chhut ta ila, kan lawm hun aiin lawmloh hun hi a tam zawk mah thin. Lawmna tur kan hmuh nasat poh leh lawm lohna tur a tam zawk emaw tih mai tur a ni.

 

Phut let nei hauh lo leh malsawmna dawn beisei lova Pathian tan a rawngbawlna kan kalpui hian kan lawm meuh em le, Lal Isua kha khawvela a awm lai khan a hnathawh ber chu rawngbawl hna a ni, Mi Piangthar Lal Isua ringtu leh a hniakhnung zui a rawngbawl tu Pathian chakna ring a, a hnena kan innghah tlat chuan Lawm chungin rawng kan bawl thei ngei ang.

 

A hmasa berah chuan,

1.  Rawngbawl pawimawhna leh tulna.

Pathian Rawngbawl chu eng nge? Rawngbawl chu mahni tan ni lo, mi dangte tana thawh mahni insengso a tih hi a ni. Rawngbawltu chu chhiahhlawh a ni a. Rawngbawl hna chu mi dang tana nun inpekna, mite tihsak nun hi a ni.

 

India ram ah mihring 1.3 Billion ah Za zel a 5.84 vel hi Kristian kan ni han en ila Rawngbawlna tur ava tam em, tunah hian Mission board hnuaiah hian Missionary 2600 vel kan awm mek a, pawl dang te nen chuan Missionary 3000 vel, Chanchintha la hre lo te Lal Isua hnen a hruai hi rawngbawlna tul taka ni mek. India rama Pathian rawngbawl a harsat chhoh zel dan kan hria, Mizoram (90%) dinhmun kan hre vek sawi belh vak ka tum lo,Thalai te hian rawngbawlna kawngah tih takna, tul tih lohna, taimakna leh inpekna hi kan tlachham tial tial niin a lang. Thalaite hi rawngbawlna kawngah hian hmasawn tur a kan than harh a hun khawp hian ka hria.

Kan veng, kan branch chhung bik hi han en ila rawngbawlna tur tul tak tak a tam hle mai, Home Mission te pawn hma an la, thalaite zinga rawngbawl tur hian keini an thalai puite bak hi an awm chuang lo a ni. Kohhran hmeichhia te hian  Chhungkua ah hian hma nasa takin an la a, Nitin chhung Inkhawm neih  te, Kristian Chhungkua ni tur a tan lak te hma an la mek, Thalaite hian hemi kawng a rawngbawlna hi kan thlawp that a, ti hmasawn tur hian tan kan lak pui a ngai ta hle mai.

 

Chanchintha Luka ziak bung 16 chang 19 atang khan Mihausa leh Lazara chungchang kan hmu a, a thawnthu chu kan hre vek awm e, MIhausa in Lazara a ngenna chungchang kha, a kut hmawr a tui chiah ringawt pawh a lei tih daih nan a dil a nih kha.

 

Kan chhiar zel chuan mitthi zing ata tho leh a, khawvela nung dama la awm te hnen a rawngbawl turin a ngen a nih kha Pathian erawh chuan Mosia leh zawlneite thu an awih loh chuan mitthi zing ata tho pawh nise an awih lovang a ti a ni, He thu hi a pawimawh hle in ka hria, Kan vai hian rawngbawl tu kan ni kan thian te kan unau te sualin a bawih beh mek leh Pathian lam ngaihsak lote chhanchhuak tur hian kan mawhphurhna hi ava sang em! Kan tih theih tawk a tlem maithei mahse Lalpa tana rawngbawl a tul zia leh a pawimawh zia hi kan hriat nawn fo a ngai a ni.

 

(KTP Member 1,47,665)  2012 - 2017 (5) KTP member thi zat hi han enchhin ila, KTP member thi zawng zawng hi mi 2607 a ni, hetah hian Mipa  thi 2333 niin Hmeichhia thi 274 a ni. Kan sawi lan duh kher nachhan chu Thihna te chu kan thu a ni hauh lo mahse thalai heti khawp mai a kan thi nasa hi a chhan a awm ang a, Hetia  rawngbawlna kan kalpui mek lai hian kan velah Pathian lam ngaihsak lem lo te , sualin a tihbuai te , lungngai beidawng te, ruihhlo bawih a tang sang tam tak te thlengphak hian rawng kan bawl lo a ni thei angem? helamah hian kan than harh ava tul em? Tih tak tak a Pathian rawnchung leh amah a innghat chung a kan zavai hian rawng kan bawl a tul tawh takzet a ni. Kan ram, kan kohhran, kan khawtlang leh kan chhungkua a lo dam theih nan theihtawp chhuah a Pathian rawngbawl hna thawh hi a tul in a pawimawh ta hle a ni.

 

Josua 24:14 atang a kan chhiar chuan Israel mipuite an saltanna ata Pathian chuan hruai chhuakin Kanaan ram chu an lut a. Joshua hi Pathian hnena rinna nghat tlat mi a ni . Israel ten Kanaan ram an luh hnuah an Pathian kal sanin, A rama cheng Amor mite sakhuana mi tam tak chuan an zawm ve nghal a. He thu Joshua a hriatin a thinrim em em a, Israel mipuite a ko khawm nghal a. Chutah chuan he thu hi a sawi a ni, "Lalpa chu tih ula, tihtakzet leh dik takin a rawng bawl rawh u, Lalpa rawngbawl hi tha lo awm a in hriat chuan, vawiinah hian tu rawng nge in bawl thlang mai rawh u, Kei leh ka chhungte zawngin Lalpa rawng ania kan bawl dawn ni", tih hi a sawi ta a ni.

 

Mihringte hian kan mangan laite, lungngaih lai leh hun hrehawma kan awm lai hian Pathian kan mamawh thin , kan au thin. Pathian chuan kan tawngtaina a chhang thin. Hun tha leh duhawm a lo inher a, a malsawmna kan dawn hian kan theinghilh leh thin. Pathian chuan chhanchhuahna kawng min hawnsak leh thin zawk a ni. Josua te chhungkua atanga zir tur kan neih chu harsatna karah pawh Pathian tana rawngbawl an thlan tlat na lai hi a ni, mi dang te hruaitu leh Pathian ringtu an nih ang tak hian Pathian rawngbawl an thlang tlat na hi a pawimawh hle a ni.

 

2. Engtin nge rawng kan bawl ang.

A chhana tawi te chu, Lawm chungin tih a ni. Mi hmai zah vang te rual pawl nan ringawt te hian rawng kan lo bawl ang tih a hlauhawm. Tawngtaina nen Pathian rawn chunga thahnem ngaihna nen rawngbawl a ngai a ni. June thla tawp khan Revival Meet Bawngkawnah neih a ni a, Pathianni zan Inkhawm tur, kan hnung a lo kal chuan," Zanin chu a tawp zan a ni bawk a kan lam nghek teh ang". a ti a. Lam a tha e, mahse a lam chhan zawk lai tak kha, Pathian chawimawi turin nge, a tawp zan a nih vang zawk, Kan rawngbawlna lh kan thil tih ber pawh hi kan chiang ta lo  em, tih chu zawhna awm thei a ni.

Chanvo kan neih avang leh kan chanvo a zir hian rawng hi kan lo bawl hram hram ang tih a hlauhawm. Rawngbawlna thilah chhuanlam ho tak siamin kan pha thin ang tih te hi a hlauhawm. Harsatna bik riau a awm a kan Pha te hi chu kan inhrethiam, mahse Phat te hi kan uar ta mah mah em Fashion ah hian kan hmang ta deuh em? Phat fo te hi incheinan a hman tlak tawp si lova. KTP Week Indoor kan hmang zo va, wekk chauh nilo thil dangah pawh, chanvo chang thei tur te a ruat tuten an han siam a, kan pha sup sup mai thin a, a hrilhaithlak thin, hruaitute leh member te in pui tawn a lawm taka rawngbawl zel tur a kan inbuatsaih thar a van tha em.

 

Kan branch hi kan vannei khawp mai, branch harsa zawkte pui thei kan ni te hi a lawmawm khawp mai, Chhawmdawlna Pual hmang a kan rawngbawlna te hi hlawhtlingin ropui  thin mahse mihring lam kan in dah len lutuk chuan Pathian hian kan rawngbawlna hi min hriatpui lovang tih a hlauhawm.

 

I Korinth 1:26-29 kan chhiar ah khan : Tirhkoh Paula`n  Pathian kohna ngaihtuah a, tisa lama mi fing tam tak te, mi chak tam tak leh mi tha tam tak te koh an nih loh thu a sawi a, mi tling lo te, mi chaklo te zawk a thlang tih thu kan hmu, Pathian hmaah chuan tumah hi inchhuang thei kan awm lo a ni. Pathian rawng kan bawl hian kan zuam lo a tling kan in ti lo va kan insit a kan huphurh thin, amaherawhchu Pathian chakna leh thiltihtheihna rinchhana a rawng kan bawl tlat chuan Pathianin mal a sawm thin

 

Mosia pawh kha Pharaoa hnenah a seilian a, Pathianin rawngbawl tur a a koh khan amah tling lo a inti a, a insit a chhuanlam a zawng a mahse amah siamtu Pathian chuan tling lo a intihna  leh a chhuanlam kha a pawm ve tlat lo, "I hnenah ka awm dawn alawm" tiin Israel fate hruai chhuak turin a thlang a nih kha. Pathian hian kan chhuanlam tam tak te, kan phatna tam tak te hi a pawm ve angem mahni inzawt thar ila, Kan nihna ang ang ang a kan in pek a Lawm taka a rawngbawl mai hi kan tih tur a ni.

 

Thalaite hi Mi rintlak, rinngam ni tur a kan in chher hriam deuh deuh a tul khawp mai. Han ngaihtuah ila kan vengah ah ringawt pawh mi hlu tak tak ten mual an liam zel a, kan hruaitu tha tak tak ten min over san zel a, an hmun ruak hi a zau thin. Engtik ni ah emaw kan kutah mawhphurhna lo thlen hun a awm dawn. An hmun ruak leh an tih ang chu kan ti ve thei kher lovang, Mahse Pathian rawngbawltu kan nih chuan keimahni a a tha ber ti thei tur a kan inbuatsaih a tul hle a ni.

 

Tunlai Khawvel changkanna mil a rawngbawl pawh hi a tulna chin a awm ta, Kohhran Kalphung thlak danglam zawng leh a awlsam zawng zawn nan erawh a tha kher lo ang, A bikin  Social Media hmang tangkai zawng a rawngbawlna huang zauh te hi a tangkai khawp ang. Remchanna lei thiam zel hi a a pawimawh thin.

 

Sam 127 ah kan hmu a, "Lalpan in a sak loh chuan a satute chuan an thawkrim thlawn mai a ni, Lalpan khawpui a vawn that loh chuan, A vengtu chu a mengthlawn mai a ni". Kan rawngbawl na ah Pathian a tel loh chuan a tlo dawn lo a, kan hlawhtling dawn lo a  ni.

 

Zakaia chungchang :  A thawnthu kan hria, Kan sawi duh lai tak zawk chu, Kan lo awm mekna kan rawngbawlna hmun te hi a lo sang mah mah tawh em, Isuan, "Zakai lo chhuk rawh vawiin ah i inah ka thleng tur a ni" a tih ang khan Lal Isua bul a awm thei tur in kan awmhmun hi siam tha ila, Lal Isua bula kal ila, a khawih phak ah awmin kan rawngbawlna pawn rah tha a chhuah thei ngei ang,"Vawiinah hian he inah hian chhandamna a lo thleng ta" kan tih ve theihna turin, keimahni theuh hi i inbuatsaih thar ang u.

 

 

3. Lawm chungin rawng i bawl ang u.

Sam 100 na (Lawmthu sawia Fakna hla) kan chhiar ah khan lawm chunga rawngbawl turin min fuih a, hla sa chunga a hmaa kal turin min sawm bawk a ni. Min siamtu chu amah chu a ni a ama ta kan ni, Lei leh van siamtu ta kan nih avang hian Phur taka rawngbawl mai tur  hi kan ni. Lawm chunga rawngbawl tur kan nih bakah Lalpa fak leh chawimawi hi kan tih tur pawimawh tak a ni bawk.

 

Ecology.com in a tarlan dan chuan Nikhat ah mi 151,600 vel thi angin, Darkar tinin mi 6,316 thi angin a tarlang. Pathian khawngaihna leh zahngaihna vang chauh a nung dama kan la awm thei te, kan vanneih zia te hi chhut thin ila, Mission Vengthlang Kohhran leh KTP a rawng kan la bawl thei te, kan tih theih ni miah lo malsawmna kan dawn avang te hian lawm taka rawngbawl mai tur kan ni, Paula pawhin, kan hnathawh tinreng Lalpa tan anga thawk turin min fuih bawk. Lawm chunga hnathawh chu a nuama, hna thawh a hlawk a, a hlawhtling thin. Peih loh chunga hnathawh chu a hreawm a, thawktu tan a nuam lo va, hnathawh a hlawk thei lo, a hlawhtling lo a, hniam lam a pan zawk thin. Rawngbawlna hlen chhuah tum zel hi puitlin zia a ni a, malsawmna pawh kan dawng thin. Thuawihna hian rawngbawltu  nunah  lâwmna  a  siam thin a,  lâwm chungin Lalpa rawng kan lo bâwl zel thei thin a ni.

 

Nu pakhat chuan, thleng silna bangah he thuziak hi a tar a: “NI TIN HELAI HMUNAH HIAN VAWI THUM PATHIAN BIAKNA KA NEI THIN.” Henu hian nitina a hnathawh chu Pathian a biakna a ni tih a hria a ni.

Pheikhawk siamtu pakhat pawh eng hna nge a thawh an zawh chuan hetiang hian a chhanga : PHEIKHAWK SIAM HNA THAWKIN PATHIAN RAWNG KA BAWL.” tiin. He pheikhawk siamtu pawh hian a pheikhawk siam hna chu Pathian biakna atan a hmang a ni. Heng mite hi an entawn tlak khawp mai.

 

Nova Chungchang: A chanchin zawng zawng sawi ka tum lem lova, Lawm chunga rawngbawl tu, mi rinawm leh Pathiana rinna nghat tu a ni, Kum 100 chhung lawng an tuk a ni a, kan rawngbawlna te hi hlawhtling thuai thuai se, a rah chhuah hmuh vat hi kan chak thin, Pathian chu a thutiamah a rinawm a ni tih kan hmuh ang khan rinawm leh chhel taka rawngbawlin Pathian remruat dan hi nghak mai tur tur zawk kan ni.  LAWM CHUNGA PATHIAN RINCHHANA RAWNG KAN BAWL CHUAN TUI LO LIANIN RUAH LEH THLIPUI LO THAWK MAHSE KAN HIM DAWN A NI.

Mahni indahthat a midang teh fo hian rawngbawlna a hlawk thei lo a a hlawhtling thei lo thin, a huhoa thawk kan ni a in pui tawn tur zawk kan ni, Group hruaituten group an rawn fang thin, group fan chauh a inkhawm tum kan nih chuan kan rawngbawlna ah hian kan tui lo a lawm a har viau maithei. Mahni kan inkhawngaihna leh mahni nawmna hi dah boin lawm chunga rawngbawl thei turin i inbuatsaih ang u.

 

A tawp berah chuan, Kraws thlir tlat ila Lal Isua tuarna nasat zia leh a inpekna te  tin, Vanah ro kan khawl a ni tih kan hriat thar a kan thlen chin atanga hmasawn tur leh rawngbawlna hlen zel thei turin  inbuatsaih ang u. Kan rawngbawl dan hi han chhut chiang ila, dik tak chuan a hahdamthlak asin, mahni inlum atangin Pathian rawng kan bawl a, min tibuaitu leh harsatna pawh nei lovin kan awm a, kan tih ve tur leh kan mawhphurhna te hi peih loh ah kan tlak ta lek lek ta ni te hian a chang chuang a lang thin.Vanneihthlak takin Mission Field ah kan zin ve ta zeuh zeuh a, Missionary a chhuakte hi an ngaihsanawm thin, kan peih loh ang chi zawng zawng hi phur takin an ti a ni ber mai hnam dang zingah hmuhsit leh harsatna karah theih tawp chhuahin rawng an bawl thei a, khaw lum te hi a manganthlak asin Bial fang tur te Inkhawm tur ringawt pawn kilometre tam tak kal a tul thin peih loh a theih lova ka theihnghilh tih a rem ve lo,AN ni chu Missionary an ni alawm kan ti maithei, Mahni Insenso a Inpekna chiah a ni pawimawh, heng te hi ngaihtuah ila min ti tang tu ni thei se a duhawm hle mai.

 

Lawm chunga rawngbawl tur kan tih mek lai hian a harsa thin, chauh chang te beidawn changte a tam thin, theihtawk chhuah nia inhriat te hian a reh vung vung te hian kan hre thin a ni,Kum chanve kan lo hmang leh der tawh a kan hmabakah rawngbawlna tur tam tak a la awm dawn, Karleh lamah Kohhran in tin a tawngtai turin kan inbuatsaih chho mek phur taka kan tih a ngai dawn, Isaia 40 kan chhiar ah khan chau hnenah thiltihtheihna a pe thin a, chakna nei lo te a ti chak thin. Tleirawlte pawh an chau ang, tlangvalte pawh an tlu der ang tih kha hmu. Mahse Lalpa nghaktute chuan an chakna an siam tha leh ang a, mupuite angin thlain an thlawk chho vang a, hah lovin an tlan ang nga, chau lovin keiin an kal ang.

Kan rawngbawlna te hi, Lalpa a kan nghah tlat chuan, hah lovin chau lovin Lawm chungin a rawng kan bawl thei zawk dawn a lo ni.

He Kan rawngbawlna a Lawm chunga rawng kan bawl zel theihna tur in kan thusawite Lalpan kan za atan malsawm rawh se.

Amen

 

 

 

 

 

 

 

 

Read More [...]

Posted in Sermon