Tlan Liam ta..

Zing dar 5 a lo ri a,ka alarm set chuan min ti harh hlawl mai a ,a nihna takah chuan ka harh zawh pawh ka ring chiah lo,kan thil tih tur avang chuan thawh han hai phal chi zia zang a ni lo,hreh tak chung chuan kan meng kawk a,mit a vai ruai mai,peih leh peih lo chuan kan zi mar te te a,ka puan sin lai chu kan hlim a,puan han sin loh chiah chuan khua chu a vawt hle a ni tih ka hre thei nghal,kawr ka hak loh avang chuan,ka thawmhnawm ka dahna lam chu kan ban tak tak a,ka ban lai te chuan ka ban te chu vawt tih avang chuan a bawl tawk tawk a,tih luih a ngai si,ka rilru te te chuan, Zing thawh atanga han peih loh nghal rik ngawt pawh chu thil tih chi a va ni dawn lo em tiin ka ngaihtuah a, ka tho tuah tuah a,ka thu ta luau a,ka sam lah a thur tha hle mai,Kum sarih dawn sam thur mang lo hian ka lo tho thin tawh si ,kan in hai mam zung zung a, lei dek tur chuan ka ke chu kan thlak thla a,ka mawza khing chu ka lo leng bo daih chu niin! ka mumang a,sangha kan manna luiah khan ka phelh tih chu ka la hre thei, ka hawn ta lo a nih dawn hi kan ti sam et a.

A.... thawh ka hai em mawn le tiin tukverhah chuan kan dak  a,khua chu a lo la thim zek mai si ,Laltrin meikhuin a ur un tawh tak mai,chhit ngun tih hriat tak chu Sunflower nawalh ngei mai chuan kan chhi eng a,duh aiin ka lo herh sang a ni chek ang chu, a khu a dum ngei phat rual a ni lo,kan herh hniam vat a,tui dehna lamah chuan ka in khai phei ta,darthlalang ah chuan kan in en a ka phu deuh zawk a,ka mit vei lam chu thil sehna niawm tak hian a vung bawk sen lawl mai a,ka mit ding lam ai chuan a meng pawh a zim bik hle,kan nuai zauh a, a thip hle mai,Zing ka thawh hlim khan a in char rei ka ti reng a ni.

Tuisik vawt zet mai chuan kan sil a,kan nuai deuh nawk nawk a, tlem chuan a tuar a nep hrat,mahse kan in hruk hul chuan a sa hut hut tih ka hre thei,a phui ka hlau hle,mit uihlit a nih dawn hi tiin Vangvat damdawi kan zawng a,a lo awm si lo,tarmit dum kan zawng leh a,bangrelah chuan Vanglaini chanchinbu September ni 9 Thursday (Ningani) 2010 tih bulah chuan a lo awm a,kan la vat a kan vuah a,men chu a nawm phah deuh chuan ka hria  chutah, a tul ang leh tih ngai chu kan ti zung zung a,ka insiam zo chu a ni ta der mai.

Zin chhuak tur kan ni bawk a,Chawlhni thawmhnaw hak na chi loh hulhual a nih avang chuan tal nawk nawk theihna tur tiin thawmhnaw tha lem lo tak chu kan in thawlh a, a chhe ber chu ka ha bik  miah lo. ania tichuan,kan zik mar leh meuh chuan Khua a lo var chiang  ta..Engkim a hmuh chian theih ta bawk a lawm mawle tiin kan in ak auh a,ka zin pui tur pawh a lo thleng ta bawk a khaw vawt tak leh hma takah chuan kan tum ram pan tur chuan thli thaw leh vaivuk khu tawn tlang tur chuan kan in kawi ah chuan kan tlan liam ta...