Europe atanga World Cup khel tura tling hmasa ber Netherlands chu World Cup final lut hmasa zawk an ni ta - Thawhleh zana semi final-a an khingpui Uruguay chu 3-2 in an hneh a, kum 32 hnuah World Cup final an lut leh ta.
Netherlands hian captain Giovanni Van Bronckhorst leh star pahnih Wesley Sneijder leh Arjen Robben-te hmangin goal an thun a; Uruguay hian thiampuipa Diego Forlan-a leh Maxi Pereira-te hmangin goal an thun.
Goal nga a lut
Inkhel ropui tak ni lo mah se, inkhel hriatreng tur a ni ang. Goal ropui kan hmu a, vanneih goal kan hmu a, hun tawp dawn 'drama' kan hmu bawk - a tawpah a khel tha zawk an ding chang ta a ni.
Inkhel tan a ni a, midfield-ah an inbeitawk a, player tha inhliam leh hrem tawk ngah zawk Uruguay an buai deuh zawk. Holland lamin captain Van Bronckhorst hmangin minute 18-naah goal an thun a, a dana dan rual loha kawhin vei lam kil atangin a pet goal.
He goal hian Uruguay a kaitho a, round of 16-a South Korea-in goal an thun hnua an khel tha ta sawt ang mai khan an khel tha sawt. Half time a hnai a, minute li chiah a awm tawh tihah Forlan a lo lang ta, kawh zet maiin a ke vei lamin a pet a, goalkeeper Maarten Stekelenburg-a'n a khawih hman a, a dang hman lo - 1-1 in an chawl.
Second half a ni a, Uruguay an khel tha tawlh tawlh a, an inringtawk tih a hriat a, Holland midfield-ah pass sual a tam hle. Nimahsela Holland-in goal an mamawh lai takin mamawh chhânna Sneijder a lo lang leh a, minute 70-naa a pet chu Uruguay defender-in a dan pial hnuah a goal - tun World Cup-a a goal ngana a ni. Minute thum a ral a, Dirk Kuyt-a ball cross chu dan hleitheih loh Robben chuan duhthusama thain a tauh goal a, 3-1 a ni.
Mi huaisen Uruguay an tlawm mai lo - inhliam Forlan an lak chhuah hnuah Maximiliano Pereira chuan minute 92-naah a thun ve leh a, a tawp dawnah Dutch player-te an buai hman kher asin!
Chak coach thu
Dutch coach Bert van Marwijk chuan, "Ka hlim em em mai a, kei ni ang ram terehte ni si World Cup kan thleng thei hi ka lawm a ni. Kum hnih kal ta atang khan hei hi kan tum ram a ni a, kan thleng thei ang tih ring chungin kan bei a, a kawng a thui deuh a, nimahsela World Cup final kan thleng ta," a ti.
Holland hi 1970's-ah khawvela team tha ber ang hiala sawi an ni a, nimahsela 1974 leh 1978 World Cup-ah final lutin a thlengtu ram ve ve an tum a, an vanduai a, an chak lo ve ve. Tunah a thlengtu ram ni lo, European 'mikhual' ve tho final-ah an hmachhawn dawn ta a ni.
Marwijk chuan, "Kum 32 hnuah final kan lut leh ta a... ka rilrua awm hmasa ber chu, '1974 leh 1978 hnuah final kan lut leh ta,' tih hi a ni," a ti.
Chak lo coach thu
Uruguay coach Oscar Tabarez chuan, "Chak loh danah duh thlang dawn ila, tuna kan chak loh dan hi ka thlang ngei ang. Uruguay huaisenzia kan pholang a, kan theihnain a tlin loh thlengin kan khel ni berin ka hria a, ka lawm a, ka naute hi ka chhuang takzet a ni," a ti.
Uruguay boss chuan, "Kan chak loh hi kan pawm a, kan khingpuite kha goal bulah an hlauhawm zawk a, team tha zawk an chak a ni. Chutih rual chuan ka naute ka chhuang a, kan khingpuite aiin kan nêp bik lo tih an lantir thei a ni... nakinah kan thlir kir ang a, Europe-a football ram ropui pathumte nen semi final kan lut a ni tih hi kan la chhuang dawn a ni," a ti.
Forlan-a chungchang a sawi a, "A inhliam a, minute khatna atangin a na tawh a, a ti hram hram a, kan lakchhuah khan chak theih kan la inbeisei a, nimahsela heti hian kan tawp ta a ni," a ti.
Tabarez chuan, "Uruguay-a football thlen chin ka hre chiang a, khawvel huapa kan dinhmunte ka hria a, chuvangin tuna kan hlawhtlinaah hian ka lawm a, ka chhuang a ni," a ti.
South America-a pangana, play off hmanga World Cup lut ve mai an ni a, semi final an thleng ta hial.
No comments:
Post a Comment